جاكت من عالرصيف

جاكت من عالرصيف


الساعة بقت 3 الفجر وخلصت شغل فى المكتب وهاموت واروح انام شوية

خلاص يا جماعة مش شايف قدامى ونفسى فى تاكسى يوصلنى لحد السرير

المهم قفلت الحساب بتاع اليوم وقمت طلعت برة قدام المكتب مستنى تاكسى

وجه تاكسى ورا التانى لحد ما وافق سواق تاكسى ابن حلال ان يركبنى معاه

اصل السواقين دلوقتى على مزاجهم

ركبت ومشى التاكسى عشان يوصلنى


سواق شاب كده لذيذ ومشغل الكاسيت على اغانى شبابى

مكانش فيه اى موضوع مشترك نتكلم فيه انا والسواق لحد ما وصل عند بياع على الرصيف بيلم فى

بضاعته وراح مقرب منه قوى وكسر العجل ناحيته

وقاله (( مساء الورد ياهندسة ))

** مساء العسل يا اسطى ** رد البياع

(( ايه قولت ايه بقى ))

** والله ما ينفع ياعم كده مش جايب همه خالص وهاتبقى خسرانة **

(( عيب بقى يا معلم عشان اروح انا طول اليوم بعدى عليك احكى فى نفس الحوار ))

** ما انتا عارف الفرشة بتصرف قد ايه ياعم والله هاتخسر كده **

(( بس انا كده هازعل وبعدين تتعوض فى حاجة تانية ))

** خلاص اركن ياعم وتعالى **

وراح السواق باصصلى وعنيه مليانة فرحة وقاللى ممكن ثوانى ياباشا لو مستعجل اوصلك وارجع تانى

قولتله لا عادى مش هى ثوانى يبقى تمام

راح راكن ونازل

وراح للبياع وسلم عليه واتكلم معاه شوية وبعدين البياع مد ايده فى شنطة وطلع منها جاكت

راح السواق مقلب فيه وقايسه وراح عادد شوية فلوس ومديهمله

وجه ركب التاكسى

ولما ركب قولتله مبروك يا اسطى

قاللى الله يبارك فيك يا ابو الشباب

ايه رأيك كده وراح مطلعه وهو فرحان من الشنطة واداهونى اشوفه

المهم قلبت فيه بعدم اهتمام وقولت له لا تمام وخامته حلوة ( قال يعنى انا بفهم فى الخامة )

وحطيته فى الشنطة واديتهوله

كل ده عادى جدا وحوار ممكن يحصل قدام اى حد وما ياخدش باله منه

لحد اما السواق فتح بقه تانى ونطق

هنا الفرق بقى الكلمة اللى طلعت بعد كده استرعت انتباهى قوى

وما تخيلتش انها ممكن تطلع من السواق ابدا

ياترى قال ايه خلانى اكتب الموضوع ده

قاللى يا جماعة

(( اهوه ياعم فى سنة 2007 بنشترى جاكت من عالرصيف بــ 250 جنيه ))

انا اتصدمت بصراحة من المبلغ

انا عمرى ما اتعاملت مع الناس بتاعت الرصيف دى ومعرفش اسعارهم بس كنت متخيل

انه مادام فارش على الرصيف يبقى اغلى قطعة ممكن يبيعها هاتبقى بالكتير قوى ب 50 جنيه

قولتله بجد يا اسطى بــ 250 جنيه ؟؟!

قاللى والله ..... ده قافش من الصبح على 280 وانا بحور معاه علشان اخده كده

بس خامته حلوة مش كده ؟؟ انا شايف اخوه فى وسط البلد عامل 360 جنيه




لحد هنا وشكرا

وكالعادة هو بيتكلم وانا مش هنا

دخلت فى مرحلة الغيبوبة الفكرية

يعنى موجود معاه جسديا لكن عقلا واذنا فى وادى تانى خالص

فى حالتنا اللى خلت الجاكت اللى على الرصيف بــ 250 جنيه

وياترى البنى أدم الطبيعى محتاج فى البرد بتاع الشتا ده كام جاكت فى الشتوية

بلاش كام جاكت خليه جاكت واحد ما احنا مش هانتنك

طيب الاسرة فيها كام شاب ؟؟

طيب ده الجاكت بس ياترى البنطلون والقميص والكوتشى او الجزمة يبقوا بكام كده من عالرصيف برضه

طيب كده كسوة الشتا للاسرة الواحدة تعمللها قد ايه ؟؟؟؟!!


بلاش ده

حصل ترابط ذهنى بين الحادثة دى وحادثة تانية حصلت الصبح

قاعد انا وصحابى فى المكتب وجعنا كنا عاوزين نفطر

عادى جدا كنا 3 بس

المهم قولتلهم انا هاروح انا واحمد نجيب الفطار ونرجع

روحنا دخلنا على البقال نجيب الفطار (( حاجات عبيطة كده جبن على لانشون وفينو وبيض ))

يعنى الحاجات البسيطة فطار البنى ادمين كلهم

المهم بعد ما اشترينا الحساب كان 23 جنيه
دفعنا ومشينا

لقيت احمد بيقوللى

الفطار لـــ 3 بس عمل 23 جنيه

يانهار ابيض ربنا يكون فى عون اهالينا

ده احنا بنتنك عليهم تناكة

واللى ما يعجبناش نرميه

ياترى لو الفطار بس فى الاسرة اللى فيها 3 اولاد هيعمل 23 جنيه

اومال الغدا بكام ؟؟

والعشا ازاى

واليوم اللى بعده منين

والاسبوع اللى قبله عدى ازاى

والشهر اللى بعده هايعدى ازاى !!!


ووصلت الى نظرية واكتشاف مهمين جدا لازم يتسجلوا بأسمى

وافتكروا يا بشر ان انا صاحب الجملة دى

((( لو حسيت يوم انك مش فاهم وحاولت تفهم ومفهمتش ... ما تحاولش تانى لان ساعتها الغباء
بيبقى قمة الذكاء منك ))

لو حد فهم معنى الجملة دى يبقى كده وصل للى انا عاوزه من الموضوع

واللى مفهمش الجملة دى ... نصيحة منى ما يحاولش يفهم خالص ويقفل الموضوع

وكأنه ما شافوش اصلا

(( اللهم ارزقنا من حيث لا ندرى ولا نحتسب ))
امين