(( ضمير للايجار ))

استقبلنى مندوب الدعاية بجريدة ( ......... ) بحفاوة بالغة وكأنى صديق قديم لم يره منذ سنوات ودار بيننا الحديث التالى :-

المندوب : اهلا وسهلا نورت الجريدة يا أستاذ

انا : ربنا يخليك الجريدة منورة بوجودك

المندوب : اتفضل استريح .... تحب تشرب ايه ..؟؟

انا : نسكافيه لو سمحت بس سكر زيادة قوى

المندوب : حاضر ياباشا من عينيا .............
أأمر يافندم

انا : الامر لله وحده انا بس كنت عاوز اعمل اعلان عندكم بس المهم عندى اكتر من الاعلان انه يكون واضح قوى وفى مكان بارز جدا ... مش مهم عندى الفلوس المهم انه يلفت الانتباه ويقراه اكبر عدد من الناس ....

المندوب : يا أستاذ ما تقلقش انا هاختار لك مكان محترم جدا وياباشا لو عاوزنى اعملهولك فى الصفحة الاولى هاعمله .. وانتا عارف كل شىء بثمنه

انا : وانا جاهز المهم انه ييجى بفايدة ..

المندوب : ان شاء الله ياباشا ييجى بفايدة

- ثم هب واقفا واحضر ماكيت جريدة واخذنا نتشاور حول المكان الملائم للأعلان حتى استقرينا على مكان بارز ومناسب
-
المندوب : هاه ياباشا انت معاك صيغة معينة للأعلان ولا هاتقولى على السلعة وانا اجهزلك صيغة حلوة ..؟

انا : لا يا أستاذ انا مجهز كل حاجة والصيغة معايا

المندوب : اتفضل يا أستاذ ملينى عشان اكتبها على الكمبيوتر واجهزها لحضرتك
انا : ماشى اكتب ياسيدى ....

ضمير للأيجار

المندوب : نعم يا أستاذ ..!!!!!

انا : بقول ضمير للأيجار

المندوب : ايوة ايوة انا سمعت بس مش فاهم

انا : مش فاهم ايه ....!! هو ده الاعلان اكتب بس ورايا

المندوب : ماشى ياسيدى كمل ..

انا :

ضمير للأيجار
ضمير بحالة ممتازة اول يد - يؤجر خالى من المبادىء والقيم والانتماء – يدين بالولاء للمؤجر – لاعلى سعر – الوسطاء يمتنعون .

المندوب : يعنى حضرتك جاى تهزر ومعطلنى عن شغلى وانا ورايا شغل كتير ... بقى بالذمة ده كلام يعنى .. اتفضل يا أستاذ مع السلامة

انا : مالك يا أستاذ فى ايه ؟ انا والله ما بهزر انا جاى بجد اعمل اعلان انتا اللى شكلك مش عاوز تشتغل بقى . دى حاجة تانية

المندوب : يا أستاذ انتا جاى تستعبط .. ولا فاضى مش لاقى حاجة تعملها فجاى تضيع وقتى .
انا : انتا شكلك مش عاوز تشتغل انا اسف انى ضيعت وقتى معاك مع السلامة

- ويبدو انه احس بنبرة الجدية فى صوتى فتراجع عن موقفه وخفف من حدة غضبه
-
المندوب : طيب اتفضل يا أستاذ ارتاح بس وفهمنى معنى الاعلان ده يمكن انا اللى غلطان وفى مكان تانى بيعمل اعلانات من النوع ده

انا : ماشى انا هافهمك بص ياسيدى

انا بقالى 30 سنة ماشى بضميرى وبراعى ضميرى فى كل حاجة عارف النتيجة كانت ايه
المندوب : ايه ....!!!

انا : ولا حاجة النتيجة بأختصار .... ولا حاجة

المندوب : يعنى ايه ...؟؟

انا : يعنى انا ولا سرقت ولا ارتشيت ولا خالفت القانون ولا خالفت ضميرى واكتشفت بعد 30 سنة ان انا اللى خسران

المندوب : ليه يعنى ... انتا كسبت نفسك واحترام الأخــ .........

انا : مقاطعا بحدة وحياة ابوك بلاش كلام الشعارات انا شبعان منه ولا بيجيب ولا بيودى وبعدين انا مش طالب حاجة كتير انا هأجر ضميرى بس لا هابيعه ولا هادخله فى ضمير تانى واخد فرق .. J تعرف يا أستاذ .... هو صحيح اسم حضرتك ايه ؟

المندوب : اسمى احمد كامل

انا : تشرفنا يا أستاذ احمد ... تعرف يا استاذ احمد اللى ادوا ضميرهم اجازة عاملين ازاى دلوقتى ..؟ كله معاه شقته التمليك اللى بيصيف فيها ده طبعا غير الفيلا والعربية والمدارس الاجنبية للأولاد غير اشتراكات النوادى والذى منه ده اللى ادى ضميره اجازة بس أما بقى اللى باع ضميره فده ما تلاقيهوش هنا .... ده بقى باع البيعة وبيتمتع بالفلوس برة ودول كتير قوى يا أستاذ
اما بقى اللى بيبع ضميره ومعاه اخلاقه المناصب بتخطفهم وبيبقوا وزرا زى وزير الثقافة وزير الرجال J ... اما بقى اللى باع ضميره واخلاقه ووطنه وانتمائه وبلده ودينه ده بيحكم الكل

المندوب : لألألأ .. كده انتا هاتخبط والعملية مش ناقصة ... انا اسف جدا انا فعلا متعاطف معاك بس للأسف مش هاقدر اساعدك .... فرصة سعيدة جدا

انا : انا اسعد والله وشكرا ليك

- انهيت حديثى بأقتضاب وانصرفت وكانت النهاية التى توقعتها تماما .. محدش هايفهمنى انا بس اللى لعيب وقدرت افهمها
-
- روحت نمت من كتر التعب فى الجدال مع الموظف الغبى ده ولم استيقظ الا فى صباح اليوم التالى وكعادتى دائما بدأت يومى بكبايه النسكافيه عشان اشربها وانا بقرأ الجرايد اليومية وفتحت جريدتى المفضلة اتفرج على الاعلانات ووجدت .....
-
- فى مكان بارز جدا فى صفحة الاعلانات فى نفس المكان اللى اختارته امبارح اعلان
-
ضمير للأيجار
ضمير بحالة ممتازة اول يد - يؤجر خالى من المبادىء والقيم والانتماء – يدين بالولاء للمؤجر – لاعلى سعر – الوسطاء يمتنعون – المخابرة مع الاستاذ احمد كامل

ووجدت نفسى رغما عنى اتمتم فى سخرية ....

أأأأأااااااه يابن اللعيبة

مصباح علاء الدين

كنت مع اصحابى النهاردة سهران والقعدة حلوة قوى

ضحك وهزار ... شوية وقلبنا على النكت كله عمال يحكى النكت الجديدة اللى عارفها

لحد ما واحد قال نكتة عجبتنى قوى .....

(( بيقولك واحد موظف وهو مروح البيت بعد يوم شغل مرهق لقى مصباح علاء الدين فرح بيه قوى وخده وجرى طيران على البيت قعد فى البيت وراح داعك المصباح بسرعة واستنى راح طالع جنى بص يمين وشمال ولما ملقاش حد غير الموظف راح نازل واخد التلاجة والتليفزيون والغسالة على كتفه ودخل المصباح تانى

الموظف استغرب وراح داعك المصباح تانى فحصل نفس الكلام الجنى طلع وبص يمين وشمال وبعدين راح نازل واخد الكنبة والانتريه والكمبيوتر ودخل المصباح

الموظف هايتجنن راح داعك المصباح تانى واستنىمكان ما الجنى بيطلع وراح قافش فيه

وقاله ايه ياعم انتا...... مش ده مصباح علاء الدين ....؟؟

الجنى راح ضاحك قوى وقاله

لا طبعا ياغبى ده مصباح علاء مبارك ))

ضحكتنى قوى النكتة ضحكت من جوايا بجد

ضحكت على حالنا وضحكت اكتر على الشعب اللى بيتسرق ويضحك

ضحكت علينا احنا يا مصريين اللى النكتة دايما سابقانا فى مصايبنا قبل افراحنا

فاكر لسة لحد دلوقتى النكت اللى طلعت ايام الزلزال

وقبلها كنت اسمع نكت عن ايام النكسة

وايام الارهاب طلعت نكت ......

وايام القطر اللى اتحرق طلعت نكت

ضحكت قوى عشان عارف ان طول ما فى نكت بيبقى فى امل ....

عارفين ليه .....!!!!

عشان بعد نكت النكسة انتصرنا

وبعد نكت الزلزال عدينا المرحلة دى ووقفنا تانى على رجلينا ..

وبعد نكت الارهاب الارهاب خلص ....

عشان كده عندى امل

ادعوا معايا ان الشعب ما يبطلش يضحك ويفضل مبسوط كده دايما

يمكن يكون هو ده العلاج لكل مشاكلنا ..

ادعوا معايا وبعد ما تدعوا اضحكوا وما تبطلوش ضحك ههههههههههههههههههههههههههههههههه

اوعوا تبطلوا ضحك ابداااااااااااااااااااا

صدقا (( يا امة ضحكت من جهلها الامم ))