هاتولنا الجوهرى يحكمنا وبلاش حسن شحاتة :(:(

أكد جمال مبارك الأمين العام المساعد. أمين السياسات بالحزب الوطني أنه لا ينوي ولا يرغب في الترشيح لانتخابات رئاسة الجمهورية.

جمال مبارك يؤكد .. التأمين الصحي حق أصيل لكل مواطن والدولة تتحمل أعباء الفقراء

دول يا جماعة خبرين ورا بعض

الخبر الاول بينفى ويؤكد على طول الخط عدم وجود اى نية لجمال فى اعتلاء منصة الحكم
والراجل بيقولها من قلبه ((( فكرتنا بالحاج مبارك الكبير والله يا جيمى ... كان دايما يقول مش هارشح نفسى تانى
بس نعمل ايه بقى احنا اللى بنضغط عليه )))
الخبر التانى بعده بيومين على طول

جمال مبارك بيدلى بتصريحات سياسية من النوع الساخن
تصريحات من اللى ما بنسمعهاش غير من الريس او من رئيس الوزرا
طب حل لنا المعادلة دى يا كبير
منين مش عاوز الكرسى
ومنين بتدلى بتصريحات سياسية من صميم العمل السياسى
طيب واحد من اللى بيقروا يسالنى سؤال مهم قوى
(( وخلوا بالكم انا احب قوى اللى يسألنى ))
طيب ده بقى معناه ايه
اقولك انا بقى
ده معناه ان الكبير قرر يغير الخطة
يعنى العملية ما بقتش بالعافية
لا العملية قلبت على خطة جهنمية
والتلميع الاعلامى بدأ عشان نشوف جمال بيننا فى كل لحظة
مهتم بينا وبمشاكلنا بيسمع لنا ويتهيألنا انه بيحرب عشاننا
واكيد صورته هاتنور فى جرايدنا واعلامنا المرئى والمسموع كتير قوى
هانشوفه فى كل لحظة بدايرة بيضا فوق راسه وبجناحين بيض بيرفرف حوالينا
ابشروا يا أخوانى فقد جاء منقذكم
ابشروا فملاكنا الحارس بات يحرسنا فى سباتنا
(( فى سباتنا فقط لاننا لسة مصحيناش ومش هانصحى ))
وملاكنا يا جماعة مش عاوز الكرسى
بس بعد فترة الشعب الغلبان هو اللى هايطالب بتوليه المنصب
لانه اصلح واحد يحكمنا بعد اللى هايعمله
واحنا كشعب غلبان ومسالم هانطالب بيه ونهتف له
زى ما هتفنا لوالده
وعاش الهتيفة والهتاف وعاشت الشعارات المليانة والجوفاء
وعاش الاعلام المرئى والمسموع والمنقول والمحمول والمهطول وبهلول وابن ابو دلدول
وعاش الامن المركزى وامن الدولة وامن الموانى وامن المطارات وامان يالالى امان
وعاش الملك مات الملك ويحيا الملك وكش ملك
وعاش وعاش وعاش كل ظلم فى حياتنا
ومات سمعنا وبصرنا وضميرنا
مات احساسنا وعقلنا وقلوبنا
ومات الشعب المصرى وعاش الريس المصرى برضه

ثوانى عشان فى واحد من اللى بيقروا شايف سؤال محيره وعاوز يقوله هنا
اتفضل قول ما تخافش انا زييى زيك مش هأذيك
انا مش فى منصب عالى ولا وزير ولا ريس
قول اللى فى نفسك
ايوة .....
اسمحلى اقول سؤالك بصوت عالى عشان اللى مكانش متابع معانا الحلقة من 24 سنة يسمعه تانى
الحل ايه دلوقتى نعمل ايه ...؟؟؟؟
انا هاقول الحل اللى عندى
وياريت كل واحد يشاركنا بالحل اللى شايفه
انا بصراحة كده قعدت مع نفسى فكرت وشربت كبايتين نسكافيه
ومخمخت لحد مالقيت الحل

عرفت مين ممكن يحكمنا بدال جمال
انا اكتشفت ان اكتر واحد الشعب المصرى هتفله من جوة قلبه
وراجل فكره عالى ومنظم وبتاع خطط
وهو اكتر واحد حقق نتائج ايجابية مع الشعب المصرى
هو ......>>>>> الجوهرى
ايوة ما تستغربوش
هو الجوهرى
واحد يقوللى ده بتاع كورة ...!!!!
طيب بذمتك وخلى بالك انا بذممك اهوه
مش الجوهرى ده اكتر واحد فرحنا لما خدنا كاس الامم
مش هو احسن واحد حقق معانا نتايج حلوة
مش هو اكتر واحد الشعب كان بيتمنى انه يمسك المنتخب تانى وكان الكلام ده من جوانا
مش بالذمة برضه احنا جه علينا وقت وهتفناله
يبقى ايه المانع انه يحكمنا
اهو على الاقل هايفرحنا
على الاقل لما ييجى هايبقى بمزاجنا
مش هانبقى مغصوبين عليه
يبقى خلاص هاتوا الجوهرى يحكمنا
ولو طلب مبلغ كبير مفيش مانع نشوف رئيس اجنبى
ياخد اقل منه بس برضه يحقق نتايج حلوة مع بلدنا
ونفتح باب الاحتراف للوزرا
ويبقى مسموح لاى حكومة تتعاقد مع 2 وزرا اجانب بحد اقصى
وبدل الانتخابات نعمل كذا حكومة ويلعبوا بنظام الدورى والنقط
واللى ياخد دورى الحكومات يشكل الحكومة بتاعته يلعب بينا قصدى يلعب بيها مع الدولة
وننظم كاس حكومات عالمى .
وكل دولة حكومتها تنزل فى الكاس
وندى عقد احتكار لكاس الحكومات لشبكة الايه ار تى
ونخلى الشيخ يبيع ويشترى فينا
واللى معاه هو بس اللى يتفرج
واللى معهوش يخليه فى دورى الحكومة المصرىيبقى بعد ده كله مش الجوهرى احسن من غيره برضه

محاكمة عاطل


لم يصدق الضابط النوبتجى بقسم (( ...... )) اذنه وهو يسمع ما يقوله الرجل الواقف امامه مما جعله يومىء له بالجلوس ثم يحدثه قائلا :-

- قوللى بقى بالراحة كده تانى اللى انتا كنت بتقوله دلوقتى
- مفيش ياباشا انا بقولك شوفلى اى جريمة فاضية عندك مش لاقيلها متهم ولبسهالى
- برضه مش فاهم
- مش محتاجة ذكاء ياباشا لفقلى اى تهمة وارمينى فى السجن
- انتا ياض شارب حاجة ؟؟؟
- اولا ما تقولش ياض لان اسمى عادل و لان اللى قدامك ده خريج كلية علوم ثانيا انا مبشربش سجاير اصلا عشان تقولى بشرب مخدرات
- اومال ايه اللى بتقوله ده مخك فوت ولا حاجة
- لا انا مطلبتش طلب غريب يعنى انا عاوز اترمى فى السجن ياترى دى كمان فيها مشكلة ومستاهلة ده كله
- اه طبعا انتا عاوزنى ارميك ظلم فى السجن هى سايبة
- يا سيدى ظلم ايه بس اعتبرنى اتاخدت من الشارع بعربية الاتارى من غير ما اعمل حاجة ولما جيت هنا لفقتولى التهمة زى ما بتعملوا على طول
- لاااا ده انتا مش ناوى تجيبها لبر بقى طيب اتفضل بقى من غير مطرود بدل ما ارميك فى الحجز
- ياسلام عز الطلب .... ارمينى فى الحجز
- بص يا استاذ انتا شكلك كده عندك مشكلة ولا هربان من حاجة وجاى تستخبى هنا اللى عاوز افهمهولك بقى ان دى مش لوكاندة ولا تكية اهلك عشان تيجى وتترمى هنا
- من غير غلط حاول تتكلم بس بأسلوب حضارى
- ياسلام وانتا بقى ان شاء الله جاى تعلمنى اكلمك ازاى انتا اتجننت يالا ولا ايه
- يالا ...؟؟!!! ده انتا بقى مفيش عندك اى رقى فى الحوار
- وكمان بتتعدى عليا بالسب طب ليلتك مش معدية انتا مش عاوز تترمى فى الحبس انا بقى مش هاخليك تخرج منه .. يا محمد تعالى ارمى الحمار ده فى الحجز
- برضه بتشتم .......؟؟ خلى عندك شوية ذوق فى التعامل
- يا مـــحــمــد تعالى خده ارميه فى الحجز بدل ما اصور قتيل النهاردة

يمشى عادل متابطا ذراع العسكرى محمد متجه معه الى الحجز

بينما يدور الحوار التالى بين الظابط النوبتجى ورئيس المباحث

- الظابط :- يافندم ده مجنون ده عاوز يتحبس وخلاص شكله هربان من حاجة
- رئيس المياحث :- والله مجنون هربان اهو يتعمله قضية ازعاج سلطات والنيابة كده كده هاتكشف عليه ولو هربان من حاجة يبقى جه برجله
- صح يافندم كلام سعادة معاليك حكم والله انا هاعمله محضر ازعاج ياخدله فيه مش اقل من اعدام هههههههه
- ويضحك رئيس الممباحث بدوره هههههههههههههههههههه

المشهد التانى

فى النيابة
امام وكيل النيابة يقف عادل منهكا من المعاملة الانسانية التى لاقاها طوال يومين فى الحجز

- وكيل النيابة اتفضل قولى بقى بالراحة كده ايه حكايتك بالظبط
- مفيش اى حاجة يافندم كله مكتوب فى المحضر هو مش حضرتك قريته
- ايوة طبعا قريته بس الكلام اللى مكتوب فيه بيقول انك اتهجمت على ظابط القسم وانك سبيته وقذفته وانك ازعجت السلطات وبصراحة منظرك الهادى ميدلش على انك تعمل كده
- بصراحة يافندم انا هاقول اللى حصل بالظبط منى (( واخذ نفسا عميقا ثم استطرد يحكى ما دث بينه وبين ظابط القسم حرفيا ))
- ماشى كل ده جميل بس انتا بقى عملت كده ليه قصدى عاوز تتحبس ليه ؟؟
- عندى اسبابى الخاصة وممتنع عن الكلام
- يابنى حرام عليك نفسك انتا كده هاتتحبس من غير سبب انا مفيش حاجحة فى ايدى غير انى احبسك على ذمة التحقيق وتتحول القضية للقضاء وده مش فى صالحك
- وانا بقولك يافندم ياريت تشوف شغلك
- ماشى وقررنا نحن وكيل اول نيابة (( ..... )) حبس المتهم عادل ... يوم على ذمة القضية


المشهد التالت

فى المحكمة

محكمة صاح الحاجب بصوت جهورى فى القاعة معلنا دخول السادة القضاة الى قاعة المحكمة

انده يابنى عالقضية الاولى

الحاجب بصوته الجهورى

القضية رقم .... والمتهم فيها عادل

- القاضى :- معاك محامى يابنى ..؟؟
- عادل لا والله انا اللى هادافع عن نفسى
- طيب النيابة تتفضل
- النيابة : - حضرات القضاة السادة المستشارين يعجز لسانى عن وصف ما حدث من المتهم حيث انه قد قام بسب وقذف المجنى عليه ضابط قسم (( .... )) بدون اى وجه حق وبدون اى رغبة فى ابداء الاسباب وقد رفض الافصاح عن اسبابه فى تحقيقات النيابة ولهذا ارى ان يتفضل السادة القضاة بمحاولة استبيان واستوضاح اسبابه ودوافعه حيث ان النيابة تعجز عن ابداء الراى فى هذه التهمة .
- القاضى :- ايه يابنى ايه اللى حصل منك وايه اللى خلاك تتعدى على الظابط فى القسم
- عادل :- ياحضرة القاضى انا متعديتش عليه ولا حاجة انا كل اللى كنت عاوزه انه يدخلنى السجن وهو ما رضيش وما تطاولتش عليه وعمرى ما افكر انى اعملها بس كنت عاوز اتحبس
- القاضى :- طيب وايه يابنى اللى مخليك عاوز تتحبس
- عادل :- انا هاقول لحضرتك لانك المفروض اللى هاتدينى الشرف ده (( الحبس )) فمن حقك انتا الوحيد اللى تعرف
- القاضى :- اتفضل يا سيدى قول
- عادل :- انا عادل خريج كليه علوم جامعة القاهرة تقديرى العام امتياز و الاول على دفعتى اللى هيا دفعة سنة 1995
- القاضى :- تشرفنا يا استاذ عادل بس ياريت برضه تقول انتا عملت كده ليه
- عادل :- حاضر يافندم انا بصراحة عاوز اتحبس عشان سمعت كتير فى الافلام والمسلسلات بيحكموا فى المحكمة بالحكم مع الشغل والنفاذ وانا نفسى يتحكم عليا زيهم
- برضه ليه ؟
- عشان انا مشتاق اسمع كلمة شغل مشتاق اشتغل ايوة ما تستغربش انا عاطل بقالى 10 سنين هى مدة تخرجى من الكلية ونفسى اشتغل ومش عارف نفسى احس انى شغال حتى لو مش هاخد فلوس بس اشتغل ولما فاض وضاق بيا الحال قررت الجأ للوسيلة دى عشان اسمع كلمة شغل عشان اصحى الصبح اروح الشغل زى اى انسان فى اى بلد عشان اروح اشتغل ولو بالاكراه بس اشتغل مش مهم فين لانها خلاص ما بقتش فارقة معايا انا عاوز اشتغل مشتاق يا ناس للشغل


ذهووووووووول ووجوم يسود القاعة

- القاضى :- بس مفيش مادة فى القانون تبيح لى انى احبسك للسبب ده
- عادل :- ومش هاتلاقى برضه مادة فى اى قانون تبيح للدولة او النظام انهم يخلونى عاطل لحد دلوقتى ده حتى قانون الغاب مفيهوش مكان لعاطل
- القاضى :- بس القانون مش هايشغلك
- عادل :- والقانون المفروض انه يحمينى وانا بطالب القانون انه يحمينى من نفسى بدل ما اتجه للسرقة او الانحراف انا بطالب القانون يحمينى
- القاضى :- حكمت المحكمة


بس لحد هنا وكفاية قوى عليا كده عشان تعبت

انا عندى للقصة دى بدل النهاية 100 نهاية

بس يبقى دوركم انتوا ايه

يا جماعة النهاية مفتوحة

وكل واحد فيكم يكتب هنا رد عليا فيه النهاية اللى هو عاوزها او اللى متخيلها بس بشرط انه يشرح هو ليه اختار النهاية دى ويكتب رايه ويرد على الكلام ده وياترى لو مكان عادل كان هايعمل ايه

وياترى هو عادل غلطان ؟؟؟

ياترى القاضى يعمل ايه ؟؟؟

ياترى ده ذنب مين ؟؟؟؟

(( ملحوظة :- القصة ملكية فكرية خاصة ليا وياريت اللى ينقل القصة دى يكتب
المصدر ))

منتظر ردودكم كلكم على القصة

واسف انى طولت عليكم