كلمة عادية زى كلام كتير بنسمعه ونقوله
ودايما الكلام كله متشابه ومتداول وزى بعضه
اللى بيفرق فى معنى الكلمة بس الموقف اللى اتقالت فيه
انا ممكن اقول الكلمة دى لما الاقى مشكلة قدامى ومش لاقيلها حل وغيرى ممكن يقولها لو رن على صاحبه وما ردش عليه
وانتا ممكن تقول الكلمة دى لو بتوقف تاكسى ومش راضى يروح المكان اللى انت رايحه
الكلمة بسيطة ومش مستاهلة انه يتعمل منها موضوع على الجروب
لكن لو حضرت الموقف اللى انا حضرته اكيد ايدك مكانتش هاتطاوعك انك تقعد ساكت وما تكتبش
انا بكتب الجملة دى عشان ده موقف بسيط قوى بيشرح الحالة اللى وصلنالها دلوقتى فى مصر
كنت واقف فى سوبر ماركت بجيب سجاير
وايه يعنى عادى ما انا كل يوم بجيب سجاير مش هى دى النقطة
وانا واقف لمحت ست عجوزة ملامح السن واخدة من وشها كتير
ومع ذلك باين عليها الوقار والاحترام وبقايا جمال اندثر بفعل عوامل الزمن
وبقايا انثى جار عليها الزمن والجوع المصرى
المهم طبعا من الذوق انى كنت اخليها تطلب قبلى حتى ولو انا جاى قبلها
سبتها مدت ايديها لصاحب السوبر ماركت بجنيهات قليلة وقالتله نص كيلو عدس
الراجل خد الفلوس وبعدين مد ايده ورجع الفلوس ليها تانى وقاللها العدس غلى يا ماما الكيلو بقى بعشرة جنيه
انا لحد ما الحوار ده اتعمل ما كنتش اعرف من الاسعار غير سعر علبة السجاير اللى بجيبها كل يوم
المهم الست بصت للراجل بنظرة الم وحسرة وراحت قايلة له طيب وانا اعمل ايه دلوقتى ...؟؟
وقعدت على الارض فى السوبر ماركت تعيط وتعيط وتعيط بحرقة وبألم
انا فى حياتى ما تخيلتش ان دموع الانسان ممكن تنزل عشان اى حاجة مهما كانت
الا فى لحظات الموت او الفراق الصعب
لكن ان دموع الانسان تنزل من عينه عشان نص كيلو عدس ....!!!!
دى كبيرة قوى
ساعتها مقدرتش امسك دموعى انا كمان وطلبت علبة السجاير ومشيت بسرعة
وانا بمسح دموع كنت فاكرها غالية وعزيزة
واكتشفت انها فى زماننا ده .... بقت ارخص من نص كيلو عدس
ليست هناك تعليقات:
إرسال تعليق